चीलको कथाबाट एमालेका नेता विष्णु रिजालको सन्देश : अब कठोर आत्मसुधारको समय”

Bishnu Rijal, नेकपा (एमाले)का केन्द्रीय सदस्य, ले सामाजिक सञ्जाल Facebook मार्फत पार्टीको वर्तमान अवस्थाबारे टिप्पणी गरेका छन्।
रिजालले “एमालेको व्यथा र चीलको कथा” शीर्षकमा लेख्दै हालै सम्पन्न निर्वाचनपछि एमालेले गम्भीर आत्ममूल्यांकन गर्दै सुधार र परिवर्तनको बाटो रोज्नुपर्ने बताएका छन्।
उनले चीलको जीवनको उदाहरण दिँदै करिब ४० वर्षपछि चीलको चुच्चो बांगो हुने, नङ कमजोर हुने र पखेटा भारी हुने अवस्था आउने उल्लेख गरेका छन्। यस्तो अवस्थामा चीलले बिस्तारै कमजोर भएर अन्त्य स्वीकार गर्ने वा कठोर पीडा सहेर आफूलाई परिवर्तन गर्ने दुई विकल्पमध्ये एउटा रोज्नुपर्ने अवस्था आउने उनले बताएका छन्।
परिवर्तन रोजेपछि चील पहाडको टुप्पोमा पुगेर आफ्नो पुरानो चुच्चो चट्टानमा रगडेर फाल्ने, नङहरू हटाउने र भारी भएका पखेटा झार्ने प्रक्रियाबाट गुज्रन्छ। केही समयपछि नयाँ चुच्चो, नयाँ नङ र नयाँ पखेटा पलाएपछि चील फेरि शक्तिशाली बन्छ र पहिलेजस्तै आकाशमा उड्न थाल्छ।
रिजालका अनुसार अहिले एमाले पनि यस्तै मोडमा पुगेको छ। पार्टीभित्र देखिएका कमजोरी, विकृति र असान्दर्भिक विषयहरूलाई त्यागेर कठोर आत्मसुधारको बाटो रोज्नुपर्ने समय आएको उनले संकेत गरेका छन्।
उनले सबै नेता–कार्यकर्ताले आ–आफ्नो ठाउँबाट सुधार र परिवर्तनका लागि योगदान गरे एमालेले पनि चीलले झैँ नयाँ शक्ति र विश्वासका साथ पुनः उडान भर्ने विश्वास व्यक्त गरेका छन्।